ساکلامین (بخور مریم) ... ڕووەکێکە بەچەندین ڕەنگ جوانیمان پێ دەبەخشێت

ناوی عه‌ره‌بی:- بخور مریم

ناوی ئینگلیزی:- Cyclamen

ناوی زانستی:- Cyclamen persicum

ناوی خێزان:- Primulaceae

نیشتمانی بنه‌ڕه‌تی :- ڕۆژهه‌ڵاتی ده‌ریای ناوه‌راست.

تایبەتمەندێتی وناساندنی رووه‌که‌که‌:- 

ڕووه‌کێکی به‌ر سێبه‌ری گه‌ڵا گۆشتنی ته‌په‌دۆرییه‌ ، گوڵه‌کانی ، ڕه‌نگاوره‌نگن ، ڕووه‌کێکی ته‌مه‌ن درێژه‌ ، ڕووه‌که‌که‌ له‌ کۆرمه‌

(کۆرم = شێوه‌ په‌تاته‌یه‌‌‌ ) وه‌ دروست ده‌بێ ، که‌ تیره‌ی (٢-١٢) سم ده‌بێت ، و گوڵ وگه‌ڵا له‌کۆرمه‌که‌ ده‌رده‌کا . شێوه‌ی گه‌ڵای هێلکه‌ییه‌ نووکی تیژه‌ و بنکه‌ی شێوه‌ دڵییه‌ ، لاسکی گه‌ڵای درێژه و‌ ڕه‌نگی سه و‌زێکی تۆخه‌ . گوڵه‌کانی زۆر جوانن شێوه‌ گوفکه‌ن و به‌ لاسکێکی درێژه‌وه‌ به‌ستراون به‌ بنکه‌ی ڕووه‌که‌که‌وه‌. به‌ری گۆله‌که‌ له‌ شێوەی که‌پسوله‌ و تۆی تیادا کۆده‌بێته‌وه‌. کاتی گوڵ کردنی له‌ سه‌ره‌تای به‌هار کۆتایی به‌هارە .‌ کۆرمی سکلامین ده‌توانرێت ( ٤ – ٥ ) ساڵ له‌ شوێنێکی له‌بار((سارد و ووشک)) هه‌ڵبگیرێ .

زۆر کردن:- 

سکلامین به‌ هۆی تۆ و پارچه کردنی کۆرم زۆرده‌کرێت.

پێداویستییه‌کانی گه‌شه‌ی ڕووه‌که‌که‌:-

سکلامین پێویستی به‌ شوێنێکی ڕووناکی مام ناوه‌ندی یان ڕووناکی ته‌واوی هه‌یه . حه‌زی له‌ شێی ( %٤٠ )و  وه‌ شوێنه‌که‌ی هه‌وا گۆرکێی هه‌بێت. ئاو دانی (٢ – ٣ ) جار یان به‌ ( گوێره‌ی پله‌ی گه‌رمی ژینگه )‌ له‌ هه‌فته‌دا. خاکی گونجاو بۆ ئه‌م ڕووه‌که‌ خاکێکه‌ له‌ پێکهاتووی ( لم و په‌ینی ئۆرگانی ) له‌گه‌ڵ ڕاگرتنی شێ به‌ به‌رده‌وامی.

مه‌به‌ست له‌ په‌روه‌رده‌کردنی سکلامین:-

بۆ لێکوه‌شاندنه‌وه‌ی ناوخۆیی و بۆ مه‌به‌ستی به‌رهه‌م هێنانی گوڵ لێکردنه‌وه‌ وفرۆشتنی گوڵه‌که‌ له‌ ناو مه‌رکان له‌ زستاندا.

سه‌رچاوه‌ :-

به‌رهه‌مهێنان وپه‌روه‌رده‌کردنی ڕووه‌که‌کانی به‌ر سێبه‌ر(د.تاهیر نجم)

ئامادەکردنی:
ئەندازیاری کشتوکاڵی
کیفی حمد حسن