قەیرانی دارایی و ئابوری چۆن چارەسەر دەکرێ؟
ئایا بە گەڕانەوە بۆ سێکتەری کشتوکاڵ دەتوانین چ ئامانجێک
بپێکین؟
وەکو شارەزایەک دەربارەی کشتوکاڵ و مامۆستایەکی زانکۆ لە چەندین
کۆنفڕانس و کۆبوونەوە و وتاردا بەردەوام تیشکم خستۆتە سەر گرنگی کەرتی کشتوکاڵی
وەکو دەروازەیەک نەک تەنها بۆ دەربازبوون لە زۆرینەی ئەو کێشانەی کە بەهۆی قەیرانی
دارایی و ئابوری دروستبووین، بەلکو وەکو کۆڵەگەیەکی سەرەکی و بتەو بۆ دروستکردنی
ژێرخانی وڵات. لەو سۆنگەیەوە بە ئەرکی دەزانم جارێکی تر لێرەوە بە بیری هەمووانی
بهێنمەوە کە گەڕانەوە بۆ بایەخی کەرتی کشتوکاڵ گرنگترین و باشترین هۆکارە کە دەبێت
حکومەت و لایەنی پەیوەندیدار هەڵوەستەی لە سەر بکەن و چیتر دوای نەخەن، خوانەویستە
ئەگەر جارێکی تریش ئەوان بە هەر هۆکارێک کشتوکاڵ پەکبخەن یان رێگربن لە
بووژانەوەی، ئەوە دەبێت مامۆستایان و شارەزایانی ئەو بوارە بەهەمەئاهەنگی لەگەڵ
رۆشنبیران و رەخنەگران هانی خەڵک بدەن کە داوکاری جدیان هەبێ لەوەی کە لە کابینەی
نوێ ی حکومەتی هەرێم کشتوکاڵ بە بایەخەوە لێی بڕواندرێ ئەگینا دڵنیام چۆن
کابینەکانی تر بێ بەرهەم و چارەسەربوون بۆ قەیرانەکان ئەوە ئەمەی ئێستاش خراپتر
نەبێ باشتر نابێ.
هەرێم لە رێگا کشتوکاڵەوە دەبوژێتەوە
۱) لە کۆمەڵگایەکی مشەخۆر و بەکاربەر دەگۆڕێن بۆ بەرهەمهێن.
۲) بێکاری کەمدەبێ و ژمارەیەکی زۆری گەنجان دەبنە خاوەنی کار، ئەوە
خۆی لە خۆیدا چارەسەری گەورەترین قەیرانە.
۳) بەهەدەر نەڕۆیشتنی پارە و داهات لە رێگای هاوردەکردنی خۆراک و
بەرهەمە کشتوکاڵیەکان.
٤) ژینگەیەکی پاک و لابەرمان دەبێت بۆ ژیان کە بەهۆیەوە رێگردەبێ
لە هەبوونی چەندین دەردو نەخۆشی.
٥) زیادبوونی رووبەری سەوزایی بە دار و درەخت و گوڵ و هیتر
هۆکارێکی باشە تا ببینە جێگای سەرنجی گەشتیاران.
٦) کاتێ هاوڵاتیان بەتایبەتی چینی گەنجان بێکارنەبوون بەلکو
بەرهەمهێنبوون متمانەیان بۆ وڵات زیاد دەکا و بەرگریکارێکی بەهێزدەبن لە هەر
مەترسیەکی دەرەکی بۆ سەر وڵات.
چەندین خاڵ و تێبینی تر هەن کە لە ژێر رۆشنایی بایەخەکانی کەرتی
کشتوکاڵی هۆکارن لە بوژاندنەوەی هەرێم و هاوتاکردنی بە وڵاتانی پێشکەوتوو، بەڵام
ئەوانەی سەرەوە دیارترین. لێرەوە جارێکی تر داوا لە هەمووان دەکەم کە هاوکاربن لە جێگا
کردنەوەی کەرتی کشتوکاڵ بە واتا جەوهەریەکەیەوە لە ناو کابینەی نوێ ی حکومەتی
هەرێم.
۱۸ / ۱۲ / ۲۰۱۸
د. رابەر فەتاح
کۆلێژی کشتوکاڵ، زانکۆی سەلاحەدین - هەولێر