چۆنیەتی دروستکردنی سرکەی سێو و سوودەکانی

تێبینی: ئەم بابەتە تایبەتە بە بلۆگەری کشتوکاڵ ، کۆپی کردن و بڵاوکردنەوەی بە بێ پرسی ئێمە یاخود سڕینەوەی ناوی ئێمە لە هەرشوێنێك ، کارێکی ناشرینە و هیچ ئازایەتییەکی تێدا نییە . سوپاسی هاوکاریتان دەکەین

سرکەی سێو : 

سرکەی سێو یەکێکە لەو پێکهاتووە سروشتیانەی کە گرنگی خۆی هەیە و سودی خۆی هەیە ، بەشێوەیەک لە زۆربەی خواردن و بارێک دا بەکاردەهێندرێت ، ئەمەش دەگەڕێتەوە کە سرکەی سێو توخمی سرووشتی چالاکی تێدایە ، لەگەڵ ئەم سوودەی زۆرەی سرکەی سێوی سرووشتی دا ،

خانمەکان زیاتر سرکەی سێوی ئامادەکراوی بازاڕ لە مارکێت و سۆپەرمارکێتەکان دەکڕن لەبەر ئەوەی خێرایە و کاتیان بۆ دەگێڕێتەوە ، بەڵام سرکەی سێوی سرووشتی سوودی زیاترە لەبەر ئەوەی سرکەی سێوی ئامادەکراو ڕێژەیەکی زۆر لە ترشی خلیکی تێدایە کە بریتییە لە ماددەیەکی پیشەسازی زۆر زیان بەخش لەسەر جەستە .

چۆنیەتی ئامادەکردنی سرکەی سێوی سرووشتی:

پێداویستییەکان:

١- ١٠ سێو 

٢- ١ لیتر ئاو

٣- قاپێکی شووشەیی قوڵ

٤- بتڵیکی گەورەی شووشەیی کە سەرەکەی بە باشی دابخرێت

٥- دەسڕی کاغەزی گەورە

٦- پاڵێوەرێک کە کونەکانی ورد یاخود بچووک بێت.

ئامادەکردن:

١- سەرەتا هەر ١٠ سێوەکە ئامادە دەکرێن ئەویش بەوەی جوان بشۆرێنەوە .

٢- هەر سێوێک قاش دەکرێت بۆ ٤ چوار پارچە

٣- قاشە سێوەکان دەخرێنە ناو قاپە شووشەییە قوڵەکە و لە پلەی گەرمی ژووردا بۆ ماوەیەک وازی لێ دەهێندرێت تاوەکو ڕەنگی سێوەکە دەگۆڕێت بۆ قاوەیی.

٤- پاش ئەوەی قاشە سێوەکان ڕەنگیان گۆڕا بۆ قاوەیی ، قاپەکە پڕ دەکرێت لە ئاو بەشێوەیەک کە هەموو قاشە سێوەکان داببپۆشێت

٥- پاشان پارچە دەسڕە کاغەزییەکە دەخەینە سەر دەمی قاپە شووشەییە قوڵەکە و بەشێوەیەکی ئاسایی لەسەری دادەندرێت و زۆر کەپس ناکرێت ، بۆ ئەوەی ڕێگە بدرێت هەندێک ئۆکسجین بچێتە ناو قاپەکەوە.

٦- پاشان قاپە شوشەییەکە دەخەینە شوێنێکی گەرم و تاریک دوور لە ڕووناکی

٧- قاپەکە بەم شێوەیە بۆ ماوەی ٤٠ ڕۆژ بەجێ دەهێڵدرێت و هەموو هەفتەیەک قاپەکە شوێنەکەی دەجوڵێندرێت و وە پاش نزیک بوونەوە لەو ماوەیە وردە وردە کەفێکی سپی لەسەر ئاوەکە و سێوەکان دروست دەبێت کە بەڵگەی بوونی بەکتریایە کە هۆکارە بۆ دروستبوونی سرکەی سێوەکە .

٨- پاشان ئاوەکە و سێوەکان بەهۆی پاڵێوەرەکەوە بپاڵێوە و سرکە پاڵێوراوەکەە بخەرە شووشەیەکی ترەوە بۆ ماوەی ٢ بۆ ٤ ڕۆژی تر لە شوێنێکی گەرم دایبنێرەوە و هەروەها دەسڕێکیشی بخەرە سەر پاشان سرکەیەکی سێوی سرووشتیت دەست دەکەوێت.

سوودەکانی سرکەی  سێو:-

١- سرکەی سێو یارمەتی ڕێکخستنی ڕێژەی شەکری ناو خوێن دەدات.

٢- سووڕی خوێن چالاک دەکات ، وە کار دەکات بۆ نوێکردنەوەی خانەکان و دروستکردنیان.

٣- پاڵەپەستۆی خوێنی بەرز کەم دەکاتەوە .

٤- هەندێک لە نەخۆشییەکانی گەدە کەم دەکاتەوە ، وە پێچ پێهاتنی ڕیخۆڵە کەم دەکاتەوە و ئازاری ناو سک ناهێڵێت.

٥- زۆر بە سوودە بۆ ئەو کەسانەی کە بەرنامەی ڕێجیم کردنیان هەیە چونکە سرکەی سێو دژی چەور و کۆلیسترۆڵە.

٦- سرکەی سێو نموونەییە لە چارەسەری سووتاوی و برینداری بەوەی کە سرکە شوێنەکەی پاکژ دەکاتەوە.

٧- سەر ئێشە کەم دەکاتەوە و جەستە چالاک دەکات و خەمۆکیش ناهێڵێت.

٨- زۆر خۆری کەم دەکاتەوە و ڕێژەی سووتاندنی خۆراک و چەوری لە جەستەدا زیاد دەکات و بەمەش یارمەتی دابەزاندنی کێش دەدات.

ئامادەکردنی:

دەوەن سەردار حەمە عەلی

ئەندازیاری کشتوکاڵ